Missiyamız mebel almaq istəyənlərə, vaxtlarına maksimum qənaət
etdirərək ən uyğun mebeli tapmalarına kömək etməkdir

Xəbərlər

“Mebel istehsalçılarının dövlət dəstəyinə ehtiyacları var

 

Təbii ağacdan mebel istehsalı sahəsində özəl sahibkar Ramiz Teymurovla müsahibə.

- Cənab Teymurov, bu gün mebel istehsalı sahəsində vəziyyəti necə qiymətləndirirsiniz?

- Təbii ağacdan mebel istehsalçıları üçün ən kəskin problemlərdən biri xammalın olmamasıdır. Bu gün mebel istehsalı üçün oduncağı rəsmi qaydada almaq çətindir. Biz yaranmış vəziyyətdən çıxış yollarını axtarırdıq və qanunun tələblərinə müvafiq fəaliyyət göstərmək məqsədilə qanuni surətdə xammal almaq üçün müvafiq dövlət orqanlarına müraciət edirdik.

Ekologiya və Təbii Sərvətlər Nazirliyində bizə meşə massivi yaratsaq, əvəzində meşə sahələrindən götürülmüş oduncaqdan xammal kimi istifadə edə biləcəyimiz barədə söz verdilər. Mən fərdi torpaq sahəmdə 4 min ağac əkdim. Lakin Nazirlik yenə də istehsal üçün lazımi xammalı əldə etməyə imkan vermədi.   

- Ağac başlıca olaraq stul və masaların istehsalında istifadə olunur. Bəs gövdə (korpus) mebelinin istehsalında vəziyyət necədir?

- Bu sahədə istehsal üçün lazımi materialların bahalığı qeyd edilməlidir. Əgər biz uşaq, yataq otaqları və ofis mebeli istehsalına başlasaq, onun maya dəyəri Avropanın inkişaf etmiş ölkələrində istehsal olunan mebelin qiymətinə çatacaq.

Onda bizim məhsul daxili bazarda yalnız imkanlı müştərilər üçün nəzərdə tutulmuş olacaq. Əks halda, o qiymət nöqteyi-nəzərindən, Çində istehsal olunmuş və ya Dubaydan ixrac edilən mebelə uduzacaq. Yerli istehsalçılar yalnız quraşdırılan mebel və ya o qədər də böyük olmayan dolablar istehsal edə bilirlər.

Əlbəttə, qeyd etmək lazımdır ki, Azərbaycanda mebel istehsalı üzrə iri şirkətlər (Embawood, Saloglu, Ruslan mebel, Kəpəz – red. qeydi) mövcuddur, onlar rəqabətə davam gətirir, mebel istehsal etməkdə və satmaqda davam edirlər. Lakin kiçik istehsalçılara bu şəraitdə fəaliyyət göstərmək çox çətindir.

- Siz masa və stul istehsalı ilə məşğulsunuz. Bu gün yerli istehsalçılar sözügedən seqmentdə Azərbaycan istehlakçılarının tələbatının hansı həcmini təmin edirlər?

- Bu gün Azərbaycan bazarında masa və stullara tələbatın 80%-i yerli istehsal hesabına təmin olunur. Lakin, qeyd etmək lazımdır ki, yerli istehsal daxili bazarın tələbatını 100% də ödəyə bilər. Xaricdən, o cümlədən Çin və Türkiyədən stul və masa ixracı yerli istehsal hesabına azalmışdır. Lakin biz heç də həmişə rəqiblərimizi ötə bilmirik. Məsələn, bəzi hallarda, türk istehsalı keyfiyyət və münasib qiymət hesabına üstünlük əldə edir.

- Mebel istehsalçıları dövlət dəstəyinə ehtiyac duyurlarmı?

- Məsələ burasındadır ki, masa və stul istehsal edən kiçik istehsalçıların 90%-i rəsmi qeydiyyatdan keçməyiblər. Öz növbəsində, bazarın da öz gerçəklikləri var. Alıcılar əvvəlcə ucuz mal axtarır, sonra onun keyfiyyətini nəzərdən keçirirlər. Dövlət isə bütün istehsalçılara eyni mövqedən yanaşmalıdır.

Əks təqdirdə, mən vergi və sosial ödənişlər edən bir istehsalçı kimi dövlətə heç nə ödəməyən, məhsulunu gizli istehsal edən istehsalçı ilə rəqabətə davam gətirə bilməyəcəyəm. Biz dəfələrlə kustar istehsalçılara qeydiyyatın üstünlüklərini izah etməyə çalışmışıq. Lakin onların hər biri yalnız öz mənfəəti barədə düşünür.     

- Sizcə, mebel istehsalçılarının güzəştli kredit ehtiyacları varmı?

- Güzəştli kredit təkcə sözdə deyil, əməldə də deyildiyi kimi olmalıdır. Müxtəlif bank və qaranlıq əməliyyatlar nəticəsində kredit heç də həmişə güzəştli olmur. Obrazlı desək, bankdan kredit götürməklə, sahibkar bankın xeyri üçün işləməli olur. Belə vəziyyətdə sadəcə öz vəsaitlərimizlə kifayətlənmək daha sərfəli olur.  

- Əgər mebel istehsalı sahəsində mövcud problemlər öz həllini tapsalar, bu sahənin inkişaf perspektivləri varmı?

- Bu gün Rusiya bazarında inkişafın böyük potensialı mövcuddur. Təkcə onu göstərmək kifayətdir ki, Rusiyada qiymətlər Azərbaycandakı “astronomik” maya dəyərindən daha yüksəkdir. Bu halda, mən masa və stulların istehsalını nəzərdə tuturam.

Məsələn, Rusiyanın mebel bazarında bu seqmentdə qiymətlər Azərbaycandakından 50% yuxarıdır. Rusiyada masa və stulların istehsalının zəif inkişaf etdiyini nəzərə alsaq, mənim həmkarlarımın bir çoxu ora getmiş və yaxşı nəticələr əldə etmişlər. Böyük xammal potensialına malik olmasına baxmayaraq, Rusiya, masa və stulları digər ölkələrdən idxal edir. Bununla əlaqədar, dövlət Rusiya bazarını ələ keçirmək üçün yerli istehsalı dəstəkləməlidir.

İstehsalçıların ümumi vəziyyəti isə çox ağırdır. Əgər bir neçə il əvvəl, mən istehsalçı kimi öz malımı xaricə ixrac edə bilirdimsə, indi mənim istehsalım yalnız özümü təmin etməyə çatır. Təəssüf ki, biz hələ dövlətin dəstəyini hiss etmirik. Əksinə, dövlət məmurların simasında bizə inkişaf etməyə hər cür mane olur. Əgər biz güzəştli kreditləşmə və digər dəstəklər şəklində dövlətin köməyini hiss etsək, qısa müddətdə xarici bazarlara çıxa bilərik.