Missiyamız mebel almaq istəyənlərə, vaxtlarına maksimum qənaət
etdirərək ən uyğun mebeli tapmalarına kömək etməkdir

Xəbərlər

Mebel seçimi: yerli, yoxsa xarici?

Milli.Az xəbər portalının Kəpəz TV kanalına istinadən verdiyi məlumata görə, Azərbaycanda mebel xərcləri adambaşına 32 dollar təşkil edir.

Lakin Avropa ölkələrində bu rəqəm olduqca yüksəkdir. Məsələn, Almaniyada bu göstərici ildə təxminən 250 avro təşkil edir ki, bu da Azərbaycandan 8 dəfə çoxdur. Bəs səbəb nədir? Bir evi mebellə təchiz etmək neçəyə başa gəlir? Azərbaycanda mebel sənayesi sürətlə inkişaf edir. Belə ki, ölkədə minlərlə kiçik mebel istehsalçısı var. Dövlət Statistika Komitəsinin məlumatına görə, Azərbaycan əhalisinin mebelə olan tələbatının 60-70 faizi yerli istehsal hesabına ödənilir.

Komitənin məlumatına əsasən, yanvar-sentyabr ayları ərzində ölkədə 28,3 milyon manat dəyərində mebel istehsal edilib ki, bu da ötən ilin analoji dövrü ilə müqayisədə 4,3 faiz azdır. Bu dövrdə mebel istehsalına 4,3 milyon manat dəyərində investisiya qoyulub. Məlumata görə, mebellərdən mətbəx üçün mebel dəstinin, mətbəx üçün kətilin, yataq mebel dəstinin qiymətləri bahalaşıb. 

Bu arada xatırladaq ki, MDB ölkələrində mebel xərcləri ildə adambaşına 22-23 dollar təşkil edir. Bu da Azərbaycandan yarım dəfə azdır. Gəncədəki mebel evinin nümayəndəsi Mahir Ələkbərov deyir ki, əgər Azərbaycanda mebel 15-16 ildə bir dəfə yenilənirsə, Avropada bu, 2-3 ildə bir dəfə baş verir.

Ölkədə mebel bazarının inkişafının həlledici faktorlarından biri gəlinə cehiz vermək adətidir. Bu bazar mövsümlə işləyir və bazarda canlılıq toyların sayından asılıdır. Belə ki, toylar olmayanda bu istər-istəməz alış-verişə təsir göstərir. Gəncədə kapuçino, qoz rəngləri dəbdədir, lakin ağ rəng üstünlük təşkil edir. Son üç ildə dünyada ən çox tələb olunan mebel rəngi ağdır. Bu rəng Gəncədə də son illər məşhurlaşıb. Müsahibimiz deyir ki, keyfiyyətli mebel məhsulları satdıqda mebel istehsalçısı alıcı qıtlığından əziyyət çəkmir.

Azərbaycanlı istehlakçılar çox mühafizəkar olsalar da son illər bu xüsusiyyət yavaş-yavaş zəifləməyə başlayır. Belə ki, hazırda modern üslubda mebellərə tələbat artır ki, bu tendensiyanın gələcəkdə də davam edəcəyi görünür. Mahir Ələkbərovun fikrincə, bununla belə, müasir üslubla yanaşı, klassik üslub həmişə bazarda olacaq.   

Mütəxəssislər bildirirlər ki, şərq üslubu daha çox şan-şöhrət, zənginliyi təcəssüm etdirir, Avropa stili isə ucuz və rahatlığı ilə seçilir. Müxtəlif mebel salonlarında apardığımız araşdırma zamanı məlum oldu ki, bir evi normal mebel dəsti ilə təhciz etmək üçün minimum 2500 manat lazımdır.

Bir az dəbdəbəli mebel dəsti isə 7-8 min manat civarındadır. Yeri gəlmişkən bildirək ki, hazırda Gəncə şəhərində satılan mebellərin əksəriyyətinin hissələri xaricdən gətirilərək burada yığılır.

Milli.Az